ბოლნისის მუნიციპალიტეტის სკოლამდელი აღზრდისა და მეთოდური კოორდინაციის დაწესებულებამ, დაინტერესებული მხარეების ჩართულობით, შეიმუშავა  დაწესებულების მისია, ხედვა და ღირებულებები, - ამის შესახებ ინფორმაცია აღნიშნულმა დაწესებულებამ გაავრცელა.

საქართველოს სტატისტიკის ეროვნული სამსახურის მონაცემებით, ბოლნისის მუნიციპალიტეტში 18 სკოლამდელი აღზრდის დაწესებულება ფუნქციონირებს, სადაც 1 244 აღსაზრდელი ირიცხება, აღმზრდელებისა და აღმზრდელის თანაშემწეთა რაოდენობა კი 114-ია.

ბოლნისის მუნიციპალიტეტში მოქმედი საბავშვო ბაღების მისია:

► მუნიციპალიტეტში მდგრადი და ეფექტიანი სკოლამდელი განათლების სისტემის შექმნა, რომელიც უზრუნველყოფს ხარისხიანი ადრეული და სკოლამდელი განათლების თანაბარ ხელმისაწვდომობას ყველა ბავშვისთვის, საცხოვრებელი ადგილისა და შესაძლებლობის შეზღუდვის მიუხედავად;

► „ადრეული და სკოლამდელი აღზრდისა და განათლების შესახებ“ კანონის და სახელმწიფო სტანდარტების დაცვით სკოლამდელი განათლების ხარისხისა და რელევანტურობის, თანასწორობის, ინკლუზიის სისტემის გაუმჯობესების და მუდმივი განვითარების მხარდაჭერა;

► თანამშრომელთათვის უწყვეტი პროფესიული განვითარების შესაძლებლობების შეთავაზება;

► აღსაზრდელის ჰოლისტური განვითარება და მისი სასკოლო მზაობის უზრუნველყოფა;

► შშმ ბავშვებისთვის შესაბამისი გარემო-პირობების შექმნა და მათი საზოგადოებაში ინტეგრირების ხელშეწყობა;

► ბავშვებში ჯანსაღი ცხოვრების წესის დამკვიდრება;

► ეფექტიანი, მდგრადი და ბავშვის ინტერესებზე ორიენტირებული მონიტორინგის სისტემის შექმნა და დანერგვა.

ხედვა:

ბოლნისის მუნიციპალიტეტის სკოლამდელი აღზრდის დაწესებულებებში გარემო იყოს მდგრადი, მუდმივ განვითარებასა და წინსვლაზე ორიენტირებული, სტანდარტების მოთხოვნათა და გამოწვევების შესაბამისად, რაც გულისხმობს, რომ:

► სკოლამდელი აღზრდა და განათლება თანაბრად ხელმისაწვდომია მუნიციპალიტეტში მცხოვრები  ყველა სკოლამდელი ასაკის ბავშვისთვის;

► საბავშვო ბაღებში აღსაზრდელები ჯანსაღ ფსოქოლოგიურ გარემოში იღებენ სკოლამდელი აღზრდის მომსახურებას;

► საგანმანათლებლო პროგრამების განხორციელებისას გათვალისწინებულია თითოეული ბავშვის  ინტერესი, შესაძლებლობები და საჭიროებები;

► ყველა გადაწყვეტილება და ქმედება ეფუძვნება და ითვალისწინებს ბავშვის საუკეთესო ინტერესს;

► დაწესებულება ზრუნავს ბავშვის ჰოლისტურ განვითარებაზე, რაც ერთდროულად და თანაბრად ბავშვის განვითარების თითოეული სფეროს - ფიზიკური და სენსორული; კომუნიკაცია, ენა და მეტყველება; სოციალურ-ემოციური; შემეცნება; დამოუკიდებლობა და ადაპტური ქცევა –განვითარებაზე ზრუნვას, სასკოლო და შემდგომი ცხოვრებისთვის მზაობას გულისხმობს;

► დაწესებულებებში დასაქმებული აღმზრდელების განათლება და კვალიფიკაცია არის მაღალი ხარისხის.

ღირებულებები:

► აღსაზრდელის საუკეთესო ინტერესებით ხელმძღვანელობა;

► განვითარება-საკუთარი საქმიანობის მუდმივი შეფასებითა და შემდგომი გაუმჯობესებით;

► პროფესიონალიზმი - თანამშრომელთა კვალიფიციურობა, გუნდურობა, ეფექტურობა, აღსაზრდელზე ორიენტირებულობა;

► საზოგადოებრივი პასუხისმგებლობის გაცნობიერება და საბავშვო ბაღის ცხოვრებაში მშობელთა ჩართულობის ზრდა.

იხილეთ ასევე:

„რისთვის არსებობს ჩვენი ბაღი?“ - როგორ უნდა ჩამოაყალიბოს სკოლამდელმა დაწესებულებამ ახალი სტანდარტით საკუთარი მისია

სკოლამდელი დაწესებულების ხელმძღვანელობამ უნდა იზრუნოს თანამშრომლების კეთილდღეობაზე, წაახალისოს და დაეხმაროს პროფესიულ ზრდაში - სტანდარტი