მუნიციპალიტეტების ნაწილში საბავშვო ბაღებში რეგისტრაციის დრო და ეტაპები უკვე ცნობილია. მართალია, საბავშვო ბაღებში რეგისტრაცია განუწყვეტლივ, მთელი წლის განმავლობაში მიმდინარეობს ვაკანტურ ადგილებზე, თუმცა, ზაფხულის პერიოდში, ეს პროცესი პრიორიტეტების მიხედვით წარიმართება.

ბათუმის საბავშვო ბაღებში აღსაზრდელების მიღება წარმოებს ონლაინ-რეჟიმში, მოქალაქეები საბავშვო ბაღში რეგისტრაციას შეძლებენ სახლიდან გაუსვლელად, კომპიუტერის მეშვეობით. რეგისტრაცია განუწყვეტლივ იწარმოებს ააიპ ბათუმის საბავშვო ბაღების გაერთიანების ოფიციალურ ვებგვერდზე: www.Batumikids.ge.

ბათუმის მუნიციპალურ საბავშვო ბაღებში რეგისტრაციის აუცილებელი პირობები:

1. ბავშვის ერთერთი მშობელი რეგისტრირებული უნდა იყოს როგორც ქ. ბათუმის მაცხოვრებელი და აღსაზრდელი უნდა დარეგისტრირდეს ერთ-ერთი მშობლის რეგისტრაციის ადგილის მიხედვით;
2. სისტემაში რეგისტრაცია შეუძლია მხოლოდ იმ აღსაზრდელს, რომელსაც შეუსრულდა 3 წელი;

2023 წლის 1 ივნისიდან რეგისტრაციის შესაძლებლობა ასევე მიეცემათ იმ აღსაზრდელებს, ვისაც 2023 წლის 31 ოქტომბრის ჩათვლით უსრულდებათ 3 წელი;

რეგისტრაციის I ეტაპი

I ეტაპი დაიწყება 2023 წლის 1 ივნისს 09.00 სთ-ზე და დასრულდება 30 ივნისს 00.00 სთ-ზე. პირველ ეტაპზე რეგისტრაციას გაივლიან და ეტაპობრივარ ჩაირიცხებიან პრიორიტეტით გათვალისწინებული სტატუსის მქონე აღსაზრდელები, ასევე ამ პერიოდამდე რეგისტრირებული და რიგში მდგომი სტატუსის მქონე აღსაზრდელები:

ა) ოჯახი, რომელიც რეგისტრირებულია სოციალურად დაუცველი ოჯახების მონაცემთა ერთიან ბაზაში და რომელთა სარეიტინგო ქულა შეადგენს 100 000 და ნაკლებს;

ბ) მრავალშვილიანი (ოთხი და მეტი შვილი 18 წლამდე) ოჯახების შვილები;

გ) მარტოხელა დედების შვილები;

დ) საქართველოს ტერიტორიული მთლიანობისთვის მებრძოლებისა და ომში დაღუპულთა ოჯახების შვილები;

ე) შეზღუდული შესაძლებლობების მქონე ბავშვები;

ვ) ერთი ოჯახიდან მეორე და ყოველი მომდევნო აღსაზრდელი -დედმამიშვილები. ამ სტატუსით მოსარგებლის ერთ-ერთი დედმამიშვილი ახალი სასწავლო წლისთვის უნდა იყოს ბათუმის საბავშვო ბაღების გაერთიანებაში შემავალი რომელიმე საბავშვო ბაღის აღსაზრდელი;

პრიორიტეტებში აღნიშნული სტატუსის მქონე მოქალაქეებს, რომელთაც არ აქვთ წვდომა ინტერნეტთან, ბავშვის დასარეგისტრირებლად შეუძლიათ მიმართონ ბაღების გაერთიანებას - ბათუმი, მელიქიშვილის ქ. 81;

რეგისტრაციის II ეტაპი

II ეტაპი დაიწყება 2023 წლის 10 ივლისიდან და იწარმოებს მთელი წლის განმავლობაში უწყვეტად. II ეტაპზე ჩაირიცხებიან რიგში მდგომი აღსაზრდელები რეგისტრაციის რიგითობის მიხედვით.

იმ შემთხვევაში, თუ საბავშვო ბაღში ადგილის არარსებობის გამო ბავშვი ვერ ჩაირიცხა ტერიტორიულად განკუთვნილ სასურველ საბავშვო ბაღში, სარეგისტარციო ონლაინ-პროგრამა მას განათავსებს სარეზერვო სიაში და ვაკანსიის შემთხვევაში პროგრამა მათ ავტომატურად, რიგითობის მიხედვით ჩარიცხავს.

იმ შემთხვევაში, თუ ჯგუფში ყველა ადგილი შევსებულია, დარეგისტრირებულ აღსაზრდელს პროგრამა აყენებს რიგში. ადგილის განთავისუფლების შემთხვევაში, რიგში მდგომ აღსაზრდელებს პროგრამა ავტომატურად ჩარიცხავს საბავშვო ბაღში.

აღსაზრდელის  საბავშვო ბაღში ჩარიცხვის შემდეგ, 10 დღის ვადაში, მშობელმა საბავშვო ბაღის გამგეს უნდა წარუდგინოს შემდეგი დოკუმენტაცია:

1. მშობლების პირადობის დამადასტურებელი მოწმობის ასლი;
2. აღსაზრდელის დაბადების მოწმობის ნოტარიულად დამოწმებული ასლი;
3. ჯანმრთელობის ცნობა (ფორმა 100);
4. ფერადი ფოტო (ორი ცალი 3X4);
5. ID ბარათის შემთხვევაში ცნობა საცხოვრებელი ადგილის შესახებ (გაცემული უფლებამოსილი ორგანოს მიერ);
6. პრიორიტეტით მოსარგებლეებმა - სტატუსის დამადასტურებელი დოკუმენტი.

...

ხაშურის მუნიციპალიტეტის სკოლამდელი აღზრდის დაწესებულებების საბავშვო ბაღების გაერთიანებაში შემავალ საბავშვო ბაღებში აღსაზრდელების რეგისტრაცია 2023 წლის 22 მაისიდან 2023 წლის 21 ივნისის ჩათვლით იწარმოებს სასურველ საბავშვო ბაღში არსებულ ვაკანტურ ადგილებზე.

აღსაზრდელთა საბავშვო ბაღში ჩარიცხვისათვის წარსადგენი დოკუმენტაცია:

1. მშობლის ან კანონიერი წარმომადგენლის განცხადება საბავშვო ბაღში მიღების თაობაზე პირადობის მოწმობის ასლებით;
2. ბავშვის დაბადების მოწმობის ასლი;
3. ბავშვის ჯანმრთელობის ცნობა ფორმა N100;
4. ორი ფოტოსურათი (3X4);
5. სოციალურად დაუცველის ან დევნილის მოწმობა, თუ განეკუთვნება აღნიშნულ კატეგორიას;
6. შეზღუდული შესაძლებლობის მქონე ბავშვის შემთხვევაში ფორმა N100 და სამედიცინო დაწესებულებებიდან გაცემული შეფასების რეკომენდაცია - საბავშვო ბაღში მიღების თაობაზე.

საბავშვო ბაღში აღსაზრდელის ჩარიცხვის დროს პრიორიტეტი მიენიჭება:

1. ოჯახებს, რომლებიც ცხოვრობენ საბავშვო ბაღის მიმდებარე ტერიტორიაზე;
2. საბავშვო ბაღის თანამშრომლების შვილებს;
3. დევნილ და სოციალურად დაუცველ ოჯახებს;
4. ერთი ოჯახის დედმამიშვილებს;
5. ოჯახებს, რომლებიც არ ცხოვრობენ, მაგრამ მუშაობენ საბავშვო ბაღის მიმდებარე ტერიტორიაზე.

...

სტატისტიკის ეროვნული სამსახურის მონაცემებით, ბათუმის მუნიციპალიტეტში 34 საჯარო საბავშვო ბაღია, ხაშურში - 18.

იხილეთ ასევე:

ბაღებში 3 წლამდე ბავშვებს არ იღებენ - „მოთხოვნა არის, მაგრამ საკრებულომ ასე გადაწყვიტა“

კურიკულუმის თამაშები - ამ დროს აღმზრდელმა უნდა გააცნოს ბავშვებს დამხმარე საშუალებები და შესაბამისი წესები