„მინდა ვუთხრა მშობლებს, რომ ჩვენ უარს არ გეუბნებით, ჩემო ძვირფასო მოქალაქენო. თანხაზე არ არის საუბარი, ეს თანხა ჩვენთვის არ არის პრინციპული და კრიტიკული, მაგრამ ღმერთმა დაიფაროს და თუ ამ წამლის მიცემით შეიძლება ისე გართულდეს ბავშვების ჯანმრთელობა, რომ უფრო ცუდად წავიდეს მათი მდგომარეობა, რა თქმა უნდა, ამ შემთხვევაში პასუხისმგებლობა იქნება ჩვენი, რაც ჩვენ არ გვინდა, რომ მოხდეს. ამიტომ საჭიროა მოცდა. მინდა მივმართო ამ ბავშვების მშობლებს, რომ სამინისტრო მზად არის ერთად გავიაროთ ეს პროცესი და გზა, დაველოდოთ მათ შორის, ჯანმოს საბოლოო დასკვნებს და ამის შემდეგ მოხდება ამ პროგრამის ამოქმედება“, - ამ სიტყვებით პრემიერმინისტრმა ირაკლი ღარიბაშვილმა დღეს, 24 აპრილს გამართულ მთავრობის სხდომაზე აქონდროპლაზიით დაავადებული ბავშვების მშობლებს მიმართა, რომლებიც იმ მედიკამენტის დაფინანსებას აქციებით ითხოვენ, მათი შვილების ჯანმრთელობის მდგომარეობის გასაუმჯობესებლად ერთადერთი იმედი რომ არის.  

ირაკლი ღარიბაშვილმა უპასუხისმგებლო პოლიტიკოსები უწოდა მათ, ვინც, მისი თქმით, ცდილობენ, აქონდროპლაზიის დაავადების მქონე ბავშვების საკითხი პოლიტიკური დივიდენდების მისაღებად გამოიყენონ.

ღარიბაშვილმა დღეს, 24 აპრილს გამართულ მთავრობის დღევანდელ სხდომაზე იშვიათი გენეტიკური დაავადების მქონე ბავშვების მშობლებს მიმართა და მოუწოდა, რამდენიმე თვე მოითმინონ და ნუ მიიღებენ პოლიტიკურ კამპანიაში მონაწილეობას.

„იმის მიუხედავად, რომ ჯანდაცვის მინისტრმა, მისმა მოადგილემ, ძალიან ავტორიტეტულმა ექიმებმა, ჯანდაცვის მსოფლიო ორგანიზაციის წარმომადგენლებმა, ყველამ ამომწურავი კომენტარი გააკეთეს და განმარტება მისცეს, როგორც გენეტიკური იშვიათი დაავადების მქონე ბავშვების ოჯახებს, მშობლებს, მინისტრი შეხვდა თავად მათ და მისი მოადგილეც, ჯერ კიდევ რჩება კითხვები. სამწუხაროდ, ნახეთ, რომ ხდება გაუგონარი რამ. უპასუხისმგებლო პოლიტიკოსები, რომლებიც გამოირჩევიან სიყალბით და ფარისევლობით, აქაც ცდილობენ უმწიკვლო, უმწეო ბავშვები დაიყენონ და პოლიტიკური კამპანია აწარმოონ.

პირველ რიგში, მინდა აქონდროპლაზიის დაავადების მქონე ბავშვების მშობლების მიმართ გამოვხატო ჩვენი სრული თანაგრძნობა. მინდა მათ ვუთხრა, რომ სახელმწიფო, მთავრობა მათ გვერდით დგას. ჩვენ ყველაფერს გავაკეთებთ, რაც საჭიროა... მთელ მსოფლიოში, 200 ქვეყანაში არც ერთი სახელმწიფო პროგრამა არ აფინანსებს ამ მედიკამენტებით მკურნალობას, ჩვენ გვეუბნებიან, 200 ქვეყნიდან საქართველო იყოს გამონაკლისი და უპასუხისმგებლოდ, პოპულისტურად ჩავერთოთ ამ პროგრამაში, რაც არის დაუშვებელი. ჩვენ რომ ვიყოთ უპასუხისმგებლო პოპულისტები, ალბათ ამ 10 მილიონს გამოვყოფდით და დავიწყებდით დაფინანსებას, მაგრამ ეს რა თქმა უნდა, არ არის სწორი. ჩვენ ვართ სამართლებრივი სახელმწიფო, ჩვენ ვუყურებთ კანონებს, წესებს და რა თქმა უნდა, ვეყრდნობით უფრო კვალიფიციურ აზრს და აქედან გამომდინარე, მინდა ვთქვა, რომ ყველაფერი იქნება ძალიან კარგად, დაველოდებით რამდენიმე თვე, მუდმივად გვექნება ინფორმაცია და კონტაქტი ამ წამლის მწარმოებელ კომპანიასთანაც, ჯანმოსთან, ევროპის ქვეყნებთან, ამერიკასთან და როგორც კი გადაწყდება, როგორც კი რამდენიმე ქვეყანა დაიწყებს ამ მედიკამენტით მკურნალობას, ჩვენც ჩავერთვებით ამ პროგრამაში“, - განაცხადა პრემიერმა.

აქონდროპლაზია იშვიათი გენეტიკური დაავადებაა, რომლის დროს ძვლების ზრდა შეფერხებულია და შეიძლება გამოიწვიოს ჯანმრთელობის ისეთი გართულებები, როგორებიცაა სუნთქვის შეჩერება, ყურის ინფექციები, ხერხემლის გამრუდება, თავის ტვინში სითხის დაგროვება ანუ ჰიდროცეფალია, ხერხემლის არხის შევიწროება, რომელიც აწვება და კუმშავს ზურგის ტვინს.

სხვადასხვა წყაროზე დაყრდნობით, აქონდროპლაზია მსოფლიოში 20-30 ათასი ბავშვიდან ერთში გვხვდება. რამდენ ბავშვს აქვს ეს დაავადება საქართველოში, ზუსტი სტატისტიკა არ არსებობს - მშობლებმა ერთმანეთთან კომუნიკაციის გზით დათვალეს, რომ აქონდროპლაზიით ქვეყანაში დაახლოებით 20-მდე ბავშვია დაავადებული, თუმცა მედიკამენტი, რომლის დაფინანსებასაც მშობლები ითხოვენ, მხოლოდ 12 მათგანს შეიძლება გამოადგეს, რადგან სხვა შემთხვევაში დაგვიანებულია.

აქონდროპლაზიით დაავადებული ბავშვების მშობლები აცხადებენ, რომ მედიკამენტი ავტორიზებულია აშშ-ის წამლისა და საკვების ადმინისტრაციის (FDA) და  ევროპის წამლის სააგენტოს (EMA) მიერ, გამოიყენება ევროკავშირის ქვეყნებში, აშშ-ში, იაპონიაში და სხვა ქვეყნებში.

იხილეთ ასევე:

ირაკლი ღარიბაშვილი: ყველა ბავშვის მკურნალობა სრულად დაფინანსდება სახელმწიფოს მიერ

„ვაქცინაცია უნდა შეეხოს ყველა ბავშვს“ - ახალი რეკომენდაცია ქვეყნის მთავრობას