საბავშვო ბაღების ავტორიზაციის დროებითი წესი და სტანდარტები შემუშავებულია და მალე საჯარო გახდება - ამის შესახებ განათლების ხარისხის განვითარების ეროვნული ცენტრის მიერ 15 თებერვალს, სკოლამდელი აღზრდის დაწესებულებების რეგისტრაციასთან დაკავშირებით ჩატარებულ საინფორმაციო ტრენინგზე, ცენტრის წარმომადგენელმა, ნინო ხითარიშვილმა განაცხადა.

განათლების სამინისტრო საბავშვო ბაღებში გადამზადებულ კადრებს გაგზავნის - დაგიგეგმავთ მიზნობრივ დახმარებებს და ხელშემწყობ აქტივობებს

 „დროებითი წესი ადგენს პროცედურულ საკითხებს - როგორ იწყება ავტორიზაცია, თავიდან რა დოკუმენტები შემოგაქვთ, როგორ მოდის თქვენთან ექსპერტი, როგორ გადის საბჭოზე და ა.შ. ავტორიზაციის სტანდარტები კი ის კონკრეტული მოთხოვნებია, რომლებიც ბაღებმა უნდა დააკმაყოფილონ. აღნიშნული დოკუმენტები უკვე მომზადებულია და ინიცირებულია მთავრობის მიერ დასამტკიცებლად. ჩვენ ველოდებით, რომ უახლოეს პერიოდში, ამ თვის ბოლომდე მაქსიმუმ, დიდი ალბათობით, ეს დოკუმენტები უნდა დამტკიცდეს“, - უთხრა  განათლების ხარისხის ეროვნული ცენტრის წარმომადგენელმა საბავშვო ბაღების წარმომადგენლებს ტრენინგზე.

ერთ-ერთი კერძო საბავშვო ბაღის ხელმძღვანელის კითხვაზე, რამდენად სავალდებულოა კერძო სკოლამდელი აღზრდის დაწესებულებებისთვის არსებული სააღმზრდელო პროგრამებისა და რეგლამენტების გათვალისწინება, რომლითაც საჯარო ბაღები ხელმძღვანელობენ, ნინო ხითარიშვილმა უპასუხა, რომ სკოლამდელი აღზრდისა და განათლების შესახებ კანონი 2016 წლიდან ძალაშია და მისი გათვალისწინება სავალდებულოა ყველასთვის, ვინც ამ სფეროში საქმიანობს, თუმცა ამ დრომდე არავინ ამოწმებდა. 

ახლა კი, ავტორიზაციის პროცესისთვის, არსებულ რეგლამენტებში გარკვეული ცვლილებების შეტანა გახდა საჭირო.

„კანონის მიხედვით, აღნიშნული რეგლამენტები ვრცელდება ერთიანად,  როგორც საჯარო, ასევე კერძო ბაღებზე. შესაბამისად, რეგლამენტის მოთხოვნების შესრულება თქვენთვისაც სავალდებულოა. ერთი სიახლე ამ ნაწილში გახლავთ ის, რომ ჩვენ გადავხედეთ ამ რეგლამენტებს და იქიდან ამოვიღეთ კონკრეტულად ის მოთხოვნები, რომელიც ავტორიზაციის პერიოდში იქნება დასაკმაყოფილებელი როგორც საჯარო, ისე კერძო ბაღების მხრიდან. ამ დეტალურ მოთხოვნებსაც, როგორც კი ავტორიზაციის დროებითი წესი და პროცედურები დამტკიცდება, დავამტკიცებთ და საჯაროდ იქნება ხელმისაწვდომი. თუ ზოგადი წარმოდგენის შექმნა გსურთ, დაახლოებით რა მოთხოვნებზეა საუბარი, შეგიძლიათ, ამ რეგლამენტებს გაეცნოთ, მაგრამ ავტორიზაციის პროცესისთვის მის სრულად დაცვას არ მოვითხოვთ. კონკრეტულ საკითხებზე გაკეთდება აქცენტები“, - ამბობს განათლების ხარისხის ცენტრის წარმომადგენელი.

იხილეთ ასევე:

ბაღის დირექტორების გაძლიერება და აღმზრდელ-პედაგოგთა წახალისება - რას გეგმავს მთავრობა

სკოლამდელი აღზრდის შესახებ კანონში ცვლილება პარლამენტმა დაამტკიცა