საბავშვო პოეტი, ცისანა ბებრიშვილი პატარებისთვის გამოცანებსაც ქმნის. ამჯერად გვთავაზობს გამოცანებს ცხოველთა და ფრინველთა ნაშიერების  შესახებ.

ანა-ბანა,  ანა-ბანა,  გამოიცან  გამოცანა!

1. ვეფხვის შვილი ბოკვერია –

ამას ვიცი, იტყვი.

მაგრამ სპილოს შვილს რა ჰქვია,

ეს თუ იცი? – ს - - - - - -

2. სიშავითაც დედასა ჰგავს –

ყვავი არის დედა მისი,

სახელად ბ - - - - - ჰქვია,

არ გეგონოთ  შვილი სხვისი.

3. სპილოს შვილი სპლიყვი არის,

დათვისა კი – ბელი.

რას ვუწოდებთ, სანამ დიდი

გაიზრდება მგელი?

4. იქნება თქვენც დამეხმაროთ

ბექა, გიორგი, მედიკო

და ყველას გააგებინოთ,

ვინ არის ნუკრის დედიკო?

5. ძროხის შვილი თვალხატულა –

ალბათ, იცნობთ, მას ხ - - ჰქვია,

მაგრამ, ზოგჯერ, მოფერებით

ბ - - - - - - - ც ეძახიან .  

6. მაიკოს და გელას ვკითხე –

დამიმალეს, არ თქვეს...

შენ თუ მეტყვი, არწივის შვილს

რა დაარქვეს? – მ - - - - - 

7. ცხენის შვილს რა ჰქვია, იცი?

– მისი სახელია კ - - - - 

8. ცხვრის შვილი ხომ ბატკანია,

ცხენისა კი – კვიცი,

მაგრამ თხის შვილს რა დაარქვეს,

ეს კი აღარ ვიცი...

9. მეც თქვენსავით მიყვარს დედა,

თემო, ნანა, გია!

თუ დედიკო აქლემი მყავს,

მაშინ მე რა მქვია?

10. ინდაურის შვილს რა ჰქვია?

გაგიგია თუკი,

გაგვიმხილე, რა დაარქვეს –

 ჭუჭული, თუ ჭ - - - ?

სწორი პასუხებია: 1. სპლიყვი 2. ბახალა 3. ლეკვი 4. შველი 5. ხბო და ბოჩოლა 6. მართვე 7. კვიცი 8. თიკანი 9. ჭუკი 10. კოზაკი

გამოსაცნობ სიტყვებში მოცემული პირველი ასოები და წყვეტილი ხაზების რაოდენობა, რაც  ამ სიტყვებში ასოთა რაოდენობის ტოლია.