13 იანვრის საღამოს, ჩვენში ძველით ახალი წელი დგება. ქვეყნის ბევრ კუთხეში 14 იანვარს თვლიან ახალი წლის საწყისად.
ძველით ახალი წელი განსაკუთრებით დასავლეთ საქართველოში, გურიაში აღინიშნება და კალანდა ჰქვია. „კალანდა“ სულხან-საბას ლექსიკონის მიხედვით, წლის თავს, ახალ წელიწადს ნიშნავს.
კალანდას გურული მწერლის, ნოდარ დუმბაძის საახალწლო დალოცვით გილოცავთ!
„ბუნების ძალავ, შემოქმედო ყოვლისა, შენ გაუთენე ჩემს ხალხს, ჩემს სამშობლოს ბედნიერი ახალი წელი.
განკურნე ყოველგვარი სენისაგან, მიეცი ჯანი მრთელი, ღონე შენი, ნიჭი შენი და უკვდავება შენი. დააშთე თვალი ყოველი მოშურნე მისი, საუკუნოდ დაგმანე ყური მსურველი და მსმენელი მისი სიავისა. გაახმე ხელი ყოველი, აღმართული მისი სიცოცხლის ხის მოჭრის სურვილად, დალოცე აკვანი, კალთა და ძუძუ საქართველოსი, ქართველი ხალხის მშობელისა.
გაავსე სახლი ყოველი მშრომელისა მზითა და სითბოთი, ბეღელი – პურით, მარანი – ღვინით, ახორი – საქონლით, კარია – ფრინველით და გული სათნოებით.
ააჟრიამულე ეზო-კარი ყოველი ქართველისა ბადიშებით, შვილთაშვილებითა და მათი შვილებით. დაუშრეტელ მდინარედ იდინე, ბედნიერებავ, ჩვენს ქვეყანაში, არ მოუშალო გონიერი ერისკაცი და მწყემსი საქართველოს.
ნატვრისთვალი დაუდე ამ ახალი წლის ღამით სასთუმალს ყველა მშრომელს, რათა დილით ადგეს, ნახოს და მამულის უკვდავება ინატროს!“
ნოდარ დუმბაძე
