სპეციალური მასწავლებელი - პედაგოგი, რომელიც აუცილებლად უნდა იყოს სასწავლო თუ სააღმზრდელო დაწესებულებაში, თუ იქ სპეციალური საჭიროებების მქონე მოსწავლე სწავლობს, ბოლო დროს ერთ-ერთ მოთხოვნად პროფესიად იქცა.
რა ფუნქციები აკისრია სპეცპედაგოგს საბავშვო ბაღში და რის ცოდნა ევალება მას, დეტალები თბილისის საბავშვო ბაგა-ბაღების მართვის სააგენტოს საკვალიფიკაციო მოთხოვნებშია გაწერილი.
ფუნქციები
სპეცპედაგოგს ევალება ინკლუზიური გარემოს შექმნის ხელშეწყობა და ცნობიერების ამაღლება ბაგა-ბაღებში.
მას ევალება ასევე აღმზრდელთან და ფსიქოლოგთან თანამშრომლობა რთული ქცევის პოზიტიურ გაძღოლაში და მულტიდისციპლინარული გუნდის წევრებთან მუშაობა.
სპეცპედაგოგის მინიმალური განათლება უნდა იყოს უმაღლესი.
იმისათვის, რომ თბილისის საბავშვო ბაგა-ბაღში დასაქმდეთ, სასურველია, შესაბამის სფეროში გქონდეთ მუშაობის მინიმუმ 1 წლიანი გამოცდილება.
სპეცპედაგოგს, რომელის საბავშვო ბაღში დასაქმდება, ევალება შემდეგი საკანონმდებლო აქტების ცოდნა:
- საქართველოს კონსტიტუცია - პირველი და მეორე თავი.
- საქართველოს კანონი - „ადრეული და სკოლამდელი აღზრდისა და განათლების შესახებ“
- საქართველოს მთავრობის №488 დადგენილება - ადრეული და სკოლამდელი აღზრდისა და განათლების სახელმწიფო სტანდარტი.
- საქართველოს მთავრობის №437 დადგენილება - „ბავშვთა დაცვის მიმართვიანობის (რეფერირების) პროცედურების დამტკიცების თაობაზე“.
- მთავრობის დადგენილება №478 – „აღმზრდელ-პედაგოგის პროფესიული სტანდარტის დამტკიცების შესახებ“.
- ადრეულ ასაკში სწავლისა და განვითარების სტანდარტები - ეროვნული სასწავლო გეგმების ბიბლიოთეკა.
- ბავშვის განვითარების თეორიები - კოგნიტური და მეტყველების სფეროს განვითარება, პიროვნულ- სოციალურ -ემოციური განვითარება, ფიზიკური განვითარება.
- ადრეული განათლების ფსიქოლოგია.
- ქ.თბილისის მთავრობის დადგენილება N13-52 „ქალაქ თბილისის მუნიციპალიტეტში ადრეული აღზრდისა და განათლების მომსახურების მიმწოდებელი ან/და სკოლამდელი აღზრდისა და განათლების მომსახურების მიმწოდებელი ან/და სასკოლო მზაობის პროგრამის განმახორციელებელი დაწესებულების პერსონალისთვის სამსახურეობრივი ინსტრუქციების, ქცევის და ეთიკის ნორმების დამტკიცების შესახებ“.
- გაეროს „ბავშვთა უფლებათა კონვენცია“.
როგორც skolamdelebi.ge-მ გაარკვია, დღეისათვის თბილისის საჯარო საბავშვო ბაღში სრულ განაკვეთზე დასაქმებული სპეცპედაგოგის ხელზე ასაღები თანხა 600 ლარს შეადგენს, ნახევარ განაკვეთზე - 450 ლარს.
იხილეთ ასევე:
როგორ უნდა მოამზადოს ბაღის აღმზრდელ-პედაგოგმა ბავშვის პორტფოლიო
