სანტა კლაუსმა რუსეთის საჰაერო სივრცის გამოყენებაზე უარი თქვა, მაგრამ საქართველოს საჰაერო სივრცე გამოიყენა, - ამის შესახებ ინფორმაციას უცხოური მედიაზე დაყრდნობით commersant.ge წერს. სანტა ორწლიანი პაუზის შემდეგ, რაც თავის მხრივ COVID-პანდემიიდან გამომდინარეობდა, იაპონიაში ჩავიდა და ამისთვის ავიაკომპანია Finnair-ის თვითმფრინავი გამოიყენა.
ფრენა სანტას მშობლიური ფინეთიდან ტოკიოს ნარიტას აეროპორტამდე, მიმდინარე წელს, ჩვეულებრივზე სამი საათით მეტხანს გაგრძელდა, რადგან Airbus A350-მა მოკლე მარშრუტი არ გამოიყენა, რომელიც რუსეთის საჰაერო სივრცეზე გადის. სანტა კლაუსი გრძელი მარშრუტით ჩავიდა დანიშნულების ადგილზე. აღნიშნული მარშრუტი კი საქართველოს საჰაერო სივრცის გამოყენებასაც ითვალისწინებდა. იაპონიიდან სანტა გაფრინდება სინგაპურსა და მუმბაიში, ინდოეთში. ჩინეთი სანტას კვლავ არ იღებს, რადგანაც ქვეყანაში ჯერ კიდევ პანდემიაა.
აღსანიშნავია, რომ 1983 წლიდან Finnair სანტა კლაუსის ოფიციალური გადამყვანი ავიაკომპანიაა. შობის მთავარი სიმბოლოს მოგზაურობა მთელს მსოფლიოში არა მხოლოდ ხელს უწყობს ქვეყნის იმიჯის პოპულარიზაციას, არამედ სიხარული მოაქვს ათასობით ბავშვსა თუ ზრდასრულისთვის.
სანტა კლაუსის წარმოშობის ისტორია წმინდა ნიკოლაუსს უკავშირდება. გადმოცემის მიხედვით, ეს ქრისტიანი წმინდანი სიცოცხლეში მალულად ეხმარებოდა უპოვრებსა და ბავშვებს. წმინდა ნიკოლაუსის დღეს, 6 დეკემბერს, საჩუქრების დარიგების ტრადიცია მოგვიანებით საშობაოდ ბავშვების დასაჩუქრების ტრადიციად ტრანსფორმირდა. ამას კი დიდი სიამოვნებით აკეთებს თანამედროვე სანტა კლაუსი.
ლეგენდის თანახმად, სანტას საიდუმლო საცხოვრებელი და სახელოსნო, სადაც საშობაო საჩუქრები მზადდება, მდებარეობს მთა კორვატუნტურიზე. მაგრამ, ვინაიდან საიდუმლო ადგილსამყოფელის შესახებ ხმა დაირხა, სანტამ გადაწყვიტა, ხალხში გამოცხადებულიყო და საამისოდ პოლარულ წრეზე, როვანიემისთან მახლობლად შეარჩია ადგილი.
ლაპლანდიის ამ პატარა სოფელში, სანტამ დააფუძნა თავისი რეზიდენცია, რომელიც ახლა მთელ მსოფლიოშია ცნობილი. სანტა კლაუსი აქ ყოველდღე მოდის, იღებს სტუმრებს, კითხულობს წერილებს, რომლების გაგზავნაც შესაძლებელია მისამართზე: Santa Klaus, 96930 Arctic Circle, Rovaniemi, Finland და იგებს, თუ რაზე ოცნებობენ ბავშვები და როგორი საჩუქრების მიღება სურთ საშობაოდ.
იხილეთ ასევე:
