ონკოლოგიური დიაგნოზის მქონე ბავშვების უცხოეთის წამყვან კლინიკებში წასაყვანად და სახელმწიფო დაფინანსების მისაღებად, განცხადებების მიღება დაიწყო.
ჯანდაცვის სამინისტოს ინფორმაციით, პროგრამის პარტნიორი კლინიკებია თურქეთის „ანადოლუს სამედიცინო ცენტრი“, ესპანეთის „ქირონ სალუდის სამედიცინო ცენტრი“ და ისრაელის „იხილოვის სამედიცინო ცენტრი“.
პაკეტი მოიცავს დიაგნოსტიკასა და სტანდარტული მკურნალობის კურსს - ქიმიოთერაპიას, სხივურ თერაპიას, ოპერაციულ ჩარევას. ასევე - პროტონოთერაპიას, პაციენტის საჭიროებებიდან გამომდინარე.
პროგრამის ბენეფიციარი შეიძლება იყოს 18 წლამდე, ონკოლოგიური დიაგნოზის მქონე პირი.
პროგრამაში მონაწილეობისთვის, მშობელმა ან ოჯახის წარმომადგენელმა უნდა მიმართოს ჯანდაცვის სამინისტროს მიმღებს და ადგილზე გააკეთოს განაცხადი, რისთვისაც საჭიროა:
1. შეივსოს განაცხადის ფორმა - ფორმას, შესავსებად და ხელმოსაწერად, განმცხადებელი, ჯანდაცვის სამინისტროში მიიღებს;
2. ბენეფიციარის და განაცხადის წარმდგენის პირადობის - დაბადების მოწმობა/პასპორტი, დამადასტურებელი დოკუმენტი;
3. ბენეფიციარის ჯანმრთელობის ცნობა - ფორმა N IV–100/ა, შესაბამისი ICD–10 და/ან NCSP კოდების მითითებით, ნათარგმნი ინგლისურ ენაზე, ნოტარიულად დამოწმებული;
4. არსებული დიაგნოსტიკური კვლევების პასუხები - მორფოლოგია, CT. და ა.შ., ნათარგმნი ინგლისურ ენაზე, ნოტარიულად დამოწმებული.
პაციენტების განაწილება კლინიკებში მოხდება მათი ინდივიდუალური საჭიროებების, კლინიკის შესაძლებლობებისა და პაციენტის ოჯახის არჩევანის გათვალისწინებით.
პროგრამის შესახებ, დეტალური ინფორმაციის მიღება შესაძლებელია ჯანდაცვის სამინისტროს ცხელ ხაზზე - 15 05.
„საზღვარგარეთ მკურნალობის პროგრამა გარდამავალი ეტაპია საქართველოში, თანამედროვე სტანდარტების, მაღალტექნოლოგიური აპარატურით აღჭურვილი ბავშვთა ონკოლოგიური სახელმწიფო ცენტრის გახსნამდე, სადაც ერთ სივრცეში, სამედიცინო სერვისების სრული სპექტრი იქნება ხელმისაწვდომი. ამ მიმართულებით, ჯანდაცვის სამინისტრო აქტიურ სამუშაოებს ახორციელებს“,- აღნიშნულია ჯანდაცვის სამინისტროს მიერ გავრცელებულ ინფორმაციაში.
იხილეთ ასევე:
ონკოლოგიური დაავადების მქონე ბავშვების საზღვარგარეთ გადაყვანა ივნისიდან დაიწყება - თანხებს სახელმწიფო გაიღებს
რომელი უწყებებისგან მიღებული ცნობის საფუძველზე მიიღება გადაწყვეტილება, რომ საბავშვო ბაღმა ფუნქციონირება შეწყვიტოს
